失去寫作的能力
自從畢業之後
雖說我而家正職收入都算十分穩定，唔需要追逐額外嘅財政資源支持理想生活，算係打消咗做slasher或者轉行嘅念頭，但間中喺instagram或者其他媒體上見到有kol分享旅行軼事或者分享會，心裡都有點不是味兒。
我並唔係妒忌其他人擁有嘅經驗，而係覺得自己可以做得好啲。大家同樣無得去旅行，但佢哋有心力將以前嘅經歷轉化成產出，而我就全年無出過一篇文。一年前我決定先專心發展正職事業，以為整體有成長自己就會滿足，到頭來見到其他人有新成就，先發現自己都仲係會唔甘心喺Personal branding上原地踏步。可能呢種感覺就係大家口中嘅「搵到自己真正嘅興趣」，唔係為錢、無任何外在incentive都想做好嘅事 — — 當佢係收入來源嗰陣反而有壓力。
執筆忘詞
但每次有「好想寫嘢」嘅念頭，開咗個draft file出嚟嘅時候，自己就會腦袋一片空白，唔知由邊度開始講起。覺得自己失去了寫作嘅能力。就好似以下呢篇文咁，腦海得返零散嘅idea，無咗以前一口氣衝到尾嘅幹勁，對文章應該點樣發展落去無咗概念。
（矛盾位：呢篇嘢出得街係咪代表我搵得返個flow）
同面對面對話唔同，同人對話多數都有基本資訊作前設，容易因應對方了解嘅水平分享 — — 我可以直接同四拍協會嘅球手分享唔同巡迴賽嘅分別，亦可以同姨媽姑姐介紹外國旅程時對Couchsurfing經理絕口不提（費事佢哋擔心）。
但對住未知嘅讀者，我唔知佢哋對我或者嘅主題有幾多了解，單向嘅發布令我必須喺一篇文章裡面構建完整嘅結構、脈絡比人跟落去，唔可以唸到啲咩就拋出黎。如果真係我手寫我心嘅話，其實唔會有人知我講乜。
想寫嘢寫唔出，就好似大腦便祕咁。明明我呢一年來試過好多新餐廳、新cafe、睇左幾本書同電影、打左唔少波、買左啲文具，但我都係無process到。睇完試完無寫低，就會塞左係個腦度，堆下堆下就大塞車。
我唔係失去批判意識成為港豬，但有想法嘅時候無好好紀錄、無比時間自己，結果就係想法碎片化，無野上到枱成為一篇完整文章。老實講，as a working adult要處理嘅嘢比我想像中要多好多，想繼續做負責任嘅大人嘅後果就係留俾自己嘅時間越來越少。
不過我都要認清自己Capacity，一放工就想瞓覺嘅我，都好難同時處理到咁多範。飲啡、出去social、打blog、打波全部都需要時間堆砌出嚟。嚟緊工作上只會越嚟越忙，唯有睇下自己喺以上邊一樣最有動力發展，同時唔會影響正職嘅學習能力。
Recent actions
知道自己係個好勝得嚟要用impulse（而非自律）嚟推動自己嘅人，最近鼓勵自己嘅行動就係睇多啲instagram心靈雞湯，創造更多令自己想學習嘅時刻。一係我睇完就動力滿滿直接開工寫嘢睇書增廣見聞，一係我覺得自己可以做得好過佢，利用自己嘅唔甘心去寫啲更加出色嘅嘢代替佢喺網絡嘅位置。（有時見到人喺社交媒體不停吹捧創業同疑似假理財真保險/傳銷就好想反駁佢地……）
你地又係點樣面對呢啲mental block？
最近對slash有啲想法，可以下篇文（如果有）再傾下。
