2020 消費回顧
大學生使曬啲錢去邊？
史兄 有云，要知道自己幾時搵夠，首先要知自己搵幾多使幾多，如果唔係就出唔到個PE ratio(Price-to-earning ratio，金融術語)。
有正職收入尤自可，收入支出多數都穩定，但一個學生仔平時都係靠補習、做helper、零用錢、獎學金等等維持生活，本來就好唔穩定，可以一個月有好多但下個月考試所以零收入。再加上戶口、信用卡、payme、投資戶口、Intern強積金啲錢度度都有啲，一個唔小心就唔知道啲錢究竟去曬邊。
再者，睇返自己一年來使咗啲錢去邊，又係一個好好嘅機會去檢視下自己嘅生活，睇下邊啲嘢喺生活中佔重要一席位。最重要嘅係，市面上或者有好多記帳工具，但唔會有一個比你自己更清楚你嘅消費習慣。
我由2016年開始砌excel，每星期填返消費同收入資料，可以之後再分析消費習慣。到而家已經第六年了，大家有興趣嘅話可以遲啲再分享。
收入 — 100000
- 全職工作(0)：比想像中遲搵到，收入爭好多
- 政府一萬蚊(10000)：對我嚟講未到救命程度，但有用嘅，拎錢快過之前嗰六千蚊好多
- 獎學金(20000)：都係主要收入來源，老實講我曾經有因為夠錢使所以搵工有啲施施然。不過呢啲運動紀錄都係前一年得返嚟，絕對稱唔上任何勞動
- 網店：讀書空窗期賣咗陣咖啡豆，賺嘅錢唔算多，但後來因為呢件事識到嘅飲咖啡圈子同埋長了很多知識，值得嘅。如果我早一兩年開始咁做，可能讀書嗰陣零用錢會鬆動好多，唔使周圍約補習走走糴糴；不過當年有無咁多人喺屋企沖咖啡又係後話了
- Personal branding + blogging：Medium改制加上自己懶，根本連Membership fee都唔夠交。前一年都仲可以賺到一兩千，而家寫一篇文飲杯咖啡都唔夠使。所以決定今年嘅文章唔再放pay wall執銀仔，可能會試下Patreon
- 屋企：全職女兒，間中有少少零用錢幫補下
支出 — 75000
今年係使左唔少，但前一兩年有啲穀種可以俾我慢慢搣，所以都唔算好擔心。再加上預計自己年尾開始全職工作，就算使凸左都應該好快搵得返。本來預留兩萬蚊再去歐洲打比賽順便Grad Trip，結果又慳返，淨返啲錢又用嚟支持本土經濟。
文具：700
曾經以為自己大個會豪爽咗買更多，其實大咗就無時間玩買到都得擺字。夠錢買嘅時候屋企啲筆已經用唔曬唔敢再買，由唔夠錢變成唔想浪費，悲哀。
（獨立書店買的）書、Kindle：2700
study from home，多咗好多時間睇書，又買多咗好多書。買咗22本、其中睇完五本、睇緊三本、有三本係kindle電子書。今年買嘅書，除左買左當學左，更多係怕佢以後出唔到版，他日有機會擺喺其他國家showcase又好乜都好。
Gear：5000
啱啱入咖啡坑，買手磨定溫壺濾杯用左幾千蚊，仲有球拍嘅保養換grip換膠之類
Learning：10000
學日文坐底六千蚊，再加上打波嘅場錢比賽錢會員年費教練費三四千。如果唔係疫情封曬場，一定再使多幾千喺比賽同book場度。同埋水上水下運動都咁高消費…
娛樂：3500
八至十月零娛樂，唔敢出無謂街，亦都無街好出。慶幸落閘前睇得曬高先三寶：幻愛、金都、叔叔，不過我覺得後面兩套比前者寫實好多，但票房不及前者，有啲可惜。
衣物、護膚：5000
上年終於用曬本來嘅手工皂存量，全年只係買左兩舊新嘅，感恩。
Breakfast：500
我的字典裡沒有早餐
Lunch：5500
早上無出街就多數自己煮，所以使好少
Dinner：1500
Dinner(with others)：13500
同朋友見面聚餐通常都貴過自己一個食
Coffee：10500
今年試多咗手沖咖啡，自己又會買豆沖，多咗好多機會試好嘢。下年大概會回歸平淡飲返啲普通嘢，唔好caffeine overdose同埋飲唔切啲豆就好了。
Snacks：2500
呢度紀錄所有喺正餐以外嘅食物。開心食甜品，唔開心都食甜品
Groceries：6000
少咗機會出街食飯自然就買多咗好嘢返歸食，酸種包成為新歡，仲有火腿、芝士、蜜糖、手工啤等舊愛。
未計好，不明
- Regular payment(plus silly sub)
- Transportation
- Donation
二零二零年已經過得唔容易，對自己就唔好咁苛刻了。繼續見字飲水睇書食少啲糖食少啲肉做多啲運動學多啲嘢維持心靈健康～
